ABŞ Milli Kartof Şurası (NPC) ölkədə kartof yetişdirilməsi üzrə tədqiqatların maliyyələşdirilməsinin tarixdə ən yüksək səviyyəyə çatdığını bildirir. Potatoworld.eu portalında qeyd olunub.
NPC bildirir ki, iyulun 28-də Senatın Təxsisatlar Komitəsi 2023-cü Maliyyə İli (23 FY) Təsərrüfatların Maliyyələşdirilməsi Qanununun öz versiyasını açıqlayıb ki, bu da kartof yetişdirilməsi üzrə tədqiqatlara 4 milyon dollar ayıracaq.
Qanun layihəsində həmçinin kənd yerlərinin inkişafı, ərzaq və dərman sanitar nəzarəti, iqlim böhranına cavab tədbirləri və s. üçün vəsait nəzərdə tutulub - bu məqsədlərə ümumilikdə 27,2 milyard dollar ayrılacaq ki, bu da ötən illə müqayisədə 8 faiz çoxdur.
“Kartof sənayesi Senatın Təxsisatlar Komitəsinin kartofçuluq istiqamətinə böyük əhəmiyyət verməsini yüksək qiymətləndirir. Biz bu proqramı hər bir maliyyələşdirmə dövrü üçün prioritet etdik və güclü komanda işi açıq şəkildə öz bəhrəsini verir”, - NPC-nin qanunvericilik işləri üzrə vitse-prezidenti RJ Andrus bildirib.
Onu da qeyd edək ki, ötən il Milli Ərzaq və Kənd Təsərrüfatı İnstitutu (NIFA) Xüsusi Tədqiqat Qrantları Proqramı vasitəsilə dörd kartof tədqiqat qrantı verib. İnstitut deyir ki, "klassik seleksiya və qabaqcıl molekulyar və biotexnoloji yanaşmalardan istifadə edərək üstün kommersiya kartof sortlarının yaradılması və sınaqdan keçirilməsinə yönəlmiş tədqiqatları" dəstəkləmək üçün kartof yetişdirilməsinə sərmayə qoyur.