Sputnik Azərbaycan xəbər verir ki, son vaxtlar Azərbaycanda yüksək keyfiyyətli yerli kartof toxumunun olmaması fermerlərin əsas probleminə çevrilib. Kartofçular xaricdən bahalı toxum gətirməyə məcburdurlar.
Tovuz Təcrübə Stansiyasında yerli sortların seleksiyası və toxumçuluğu həyata keçirilir. Mütəxəssislər yerli toxumların xaricdən gətirilən kartofdan daha ucuz və məhsuldar olduğunu bildirirlər. Aran ovalığının tarlalarında yaxşı qulluq etməklə, hər hektardan təxminən 25-30 ton məhsul götürmək olar.
“Hazırda Tovuzdakı Təcrübə Stansiyasının sahələrində yerli kartofun “Əmir-600”, “Sevinc”, “Telman” sortlarının toxumları becərilir. Xaricdən gətirilən sortlardan fərqli olaraq yerli toxum daha ucuzdur. Amma onlar kifayət etmir və əksər fermerlər onlardan istifadə edə bilmir”, - Tovuz Təcrübə Stansiyasının kartof yetişdirilməsi üzrə seleksiya-toxum laboratoriyasının müdiri Yusif Mustafayev deyir.
Mustafayevin sözlərinə görə, çatışmazlığın səbəbi eksperimental sahələr üçün əkin sahəsinin az olmasıdır.
“Biz yeni kartof sortlarının yaradılmasına çalışırıq. Hazırda İnstitut artıq bir neçə yeni məhsul yaratmışdır. Bunlar Çənlibel, Uğur, Vaqif və başqalarıdır. Onlar məhsuldar və xəstəliyə davamlıdırlar. Ancaq təcrübə sahələri kifayət deyil. Məqsədimiz respublikanı yaxın gələcəkdə toxumla təmin etmək üçün toxumların sayını artırmaqdır”.
Azərbaycanda hazırda 60-70 min hektar sahədə kartof əkilir və təsərrüfatlar bu məhsulun toxumuna 200 min tondan çox tələb edir.